Stafræna gjáin - tölvur á bókasöfnin

Ég verð að segja að ég er tiltölulega ánægð með Bill Gates þessa dagana. Samkvæmt fréttum síðasta fimmtudag ætlar stofnun hans að styrkja stjórnvöld í Rúmeníu til þess að koma tölvum fyrir í öllum opinberum bókasöfnum í landinu. "Tilgangurinn er að gera öllum Rúmenum kleyft að nota tölvur og komast á Netið án þess að þurfa að greiða fyrir. Stofnunin stefnir á að gera slíkt hið sama í Chile, Lettlandi, Litháen og Mexíkó á næstu mánuðum." (mbl.is)
Ég er hæstánægð með staðarvalið - bókasöfnin. Þangað geta allir komið. Kannski verður þetta til þess að stafræna gjáin grynnkar eitthvað. Helstu ástæður þess að fólk notar ekki tölvur er kostnaðurinn við að kaupa þær og kunnáttuleysi. Auðvitað verða þessi bókasöfn að einhverju marki að kenna notendum að nota tölvurnar og hvetja til notkunar þeirra. Það er ekki allt fengið með að setja þær upp og stinga í samband.

Skólasöfnin blogga

Afmælisnefnd skorar í bókasafns- og upplýsingafræði við HÍ setti saman röð hádegisfyrirlestra og í dag var annar í röðinni haldinn í Þjóðarbókhlöðu. Þar sögðu tveir frábærir skólasafnskennarar frá reynslu sinni, þær Ingibjörg í Flataskóla (gamla skólanum mínum) og Kópavogsskóla (skólanum sem dætur mínar eru í) (tilviljun - já algjör!).

Anna Björg í Kópavogsskóla er að ljúka MLIS námi og sagði frá rannsókn sem hún hefur unnið á viðhorfi skólasafnskennara og bekkjakennara til skólasafnsins. Þar virðist viðhorfið stundum vera að skólasafnskennarinn (sem er "þreyttur bekkjakennari") eigi að kenna börnunum góða hegðun! Ekki er nú öll vitleysan eins. Ingibjörg í Flataskóla sagði frá frábæru lestarmaraþoni þar sem sjöundi bekkur fékk að gista á skólasafninu og lesa með vasaljós fram á nótt.

Skólasafnskennarar leggja grunn að upplýsingalæsi barnanna okkar og tek ég ofan fyrir þeim.

Á fundinum heyrði ég í fyrsta sinn af bloggsíðu skólasafna en það er bloggsíðan Skólabókasafnið. Þessari bloggsíðu er haldið úti af starfsmönnum 12 skólasafna í austurborginni. Frábært framtak þar. Og þær vísa yfir á bloggsíðu Húsaskóla sem er líka alveg frábær. Öflug blogg sem eru títt uppfærð.

Blogg í bókasöfnum og fyrirtækjum

Las í dag góða dóma um bókina hennar Anne Clyde: "Weblogs and libraries" m.a. eftir Phil Bradley í Free Pint og Roddy MacLeod í Internet Resources Newsletter þar sem segir m.a. "Weblogs and libraries is essential reading for those in the library and information world who seek or use online information. Bravo to Chandos for publishing this book, and to Laurel Clyde for writing such a helpful work." Bókin er t.d. til á Amazon. Ég hlakka til að lesa þessa bók en fyrirlestrar Anne á Online ráðstefnunni í London nú um síðustu mánaðarmót nóv/des var mjög upplýsandi um blogg. Hún fjallaði þar bæði um blogg í bókasöfnum og fyrirtækjum (enterprise eða corporate blogging).
Til hvers ættu bókasöfn að blogga? Til þess að upplýsa viðskiptavini sína um nýjungar í þjónustunni, nýútkomnar bækur sem skráðar hafa verið á safnið, uppákomur og annað slíkt. Sölupunktar eru t.d. markaðssetning, samskipti, dreifileið þjónustu til viðskiptavina og fréttabréf.
Ég sé blogg nýtast fyrirtækjum m.a. sem tól í verkefnastjórnun, sérstaklega þá á innri vefjum fyrirtækja. Sérstakur kafli um blogg þyrfti þá að vera í upplýsingastefnu fyrirtækisins þar sem tæpt væri meðal annars á siðareglum, bloggi starfsmanna utan fyrirtækisins og þess háttar.