Um sokka og kjarkleysi

Mig langar svo að prjóna sokka. Keypti garnið fyrir mörgum möööörgum mánuðum síðan en hef ekki komið mér að verki. Vantar uppskrift, kann ekki að prjóna hæl, og svo fram eftir götunum. Ég er auðvitað sérfræðingur í að finna upp afsakanir fyrir það sem ég nenni ekki að gera en hér vantar mig hjáááálp.
Garnið er ofsalega fallegt
.

Vettlingaæði

Var loksins að klára þessa flottu stráka vettlinga. Uppskriftin er úr Hlýjar hendur en ég tók stelpurnar út úr mynstrinu því þessir eru fyrir strákinn. Garnið er hræódýrt og gott úr Europris og túrkis liturinn er yndislegur.
Myndin er reyndar tekin í fyrrasumar - þá gerði ég tvo vettlinga með smá millibili og lenti í því að annar varð stærri en hinn - þannig fóru þeir í salt þar sem túrkisgarnið var búið (notaði það auðvitað í kósýsokka líka því það er svo fallegt). Keypti svo loksins meira núna um daginn og náði að prjóna rétta stærð á móti öðrum. Nú er bara að prjóna rétta stærð á móti hinum :o)

Prjónabækur

Var að fá hvorki fleiri né færri en FJÓRAR prjónabækur frá Amazon :o) Alveg jólin í febrúar bara.

The Essential Guide to Colour Knitting - eftir Margaret Radcliffe (útg. ágúst 2009)
Mastering Colour Knitting - Glæný bók eftir Melissa Leapman (útg. jan. 2011)
The Knitter's Companion - eftir Vicky Square (útg. 2006 af Interweave)
60 Quick Knits in Cascade - vettlingar, treflar og húfur og stórsniðugar barnauppskriftir (útg. 2010)

Kúvending

Langar að prófa að nota gamla bloggið mitt fyrir áhugamálið sem ég var svo heppin að finna fyrir rúmu ári síðan - okt. 2009 :o) Nú prjónar konan eins og vindurinn og er jafnvel farin að hekla aðeins líka!
Ég er búin að kaupa dálítið af bókum og langar að skrifa um þær líka. Og garnið - allt garnið maður!
Sjáum til - ætla að bæta meira inn hér um helgina sem er framundan

Hvað er spunnið í opinbera vefi 2007

Jáhá, þá liggur þetta fyrir. Fasteignamat ríkisins skorar 100% hvað aðgengi varðar í könnun forsætisráðuneytisins og Sambands íslenskra sveitarfélaga á opinberum vefjum nú í haust. Sjá framkvæmdi þessa könnun nú eins og 2005 og þá skoraði FMR 0% í aðgengi. Drifið var í því þá að fá heildarúttekt á vefnum og keyrt í vottun um forgang 2 - fyrst allra ríkisstofnanna. Þjónustuliður vefsins situr enn á hakanum. En hvernig borðar maður fíl....

RÚV skorar hærra en FMR hvað þjónustu varðar eða 75% á móti 50%. Ég er mjög ánægð að sjá það því að öðru leyti skorar sá vefur því miður ekki hátt. Aðgengiseinkunn uppá aðeins 30% er ekkert til að monta sig af. Því miður. Ég veit fyrir víst að ekki skortir metnaðinn hjá RÚV. Þar hefur verið komið á fót vefráði og ýmislegt spennandi framundan.

Í heildina hefur aðgengi að opinberum vefjum aukist um 20% milli þessara tveggja ára eða úr 21% í 41%. Meiri áhersla hefur greinilega verið lögð á að bæta aðgengið þar sem nytsemi eykst um 6% og innihald batnar aðeins um 1%. Rafræn þjónusta hefur tekið stakkaskiptum á vefnum. Rafræn afgreiðsla er nú á 19% opinberra vefja - var einungis á 3% þeirra.

Sjá skýrsluna í heild sinni og í hlutum.


(ps. já, ég er fyrrverandi vefstjóri FMR en ekki núverandi vefstjóri RÚV heldur safnastjóri)

Online Information ráðstefnan

Online information ráðstefnan er árlegur viðburður í London. Í ár er hún haldin 4-6 desember. Ég hef verið svo heppin að komast þangað tvisvar, 2004 og 2005 og hlusta á gúrúa eins og Jakob Nielsen, Phil Bradley, Peter Morville og Louis Rosenfeld sem skrifuðu bókina Information Architecture for the World Wide Web. 2005 sá ég líka Jimmy Wales sem stofnaði Wikipedia og hann verður núna með inngangserindi á ráðstefnunni.



Ráðstefnan nú í desember mun mest snúast um Web 2.0, samfélagið á netinu (Social Networks) og rannsóknir tengdar leitartækni. Fyrir hádegi á miðvikudeginum 5. des. verður fjallað um samspil Intranets og Web 2.0. Hljómar spennandi. Í tengslum við ráðstefnuna er gríðarstór sýning og á henni eru fjölmargir ókeypis fyrirlestrar.

Gerðu góðverk - gefðu grjón

FreeRice

Þetta er alveg stórsniðugt verkefni - þú bætir við orðaforðann í enskunni og gefur hrísgrjón í leiðinni. Þú færð orð á skjáinn og velur samheiti þess úr fjórum möguleikum. Fyrir hvert orð sem þú nærð réttu gefa nokkur fyrirtæki 10 hrísgrjón sem Sameinuðu þjóðirnar sjá um að innheimta og færa hungruðum heimi - World Population Foundation.
Þann 20. nóvember höfðu þegar safnast tvær og hálf billjón grjóna sem nægja til að fæða 125.000 manns. Verkefnið FreeRice var sett af stað að kvöldi þakkargjörðardags bandaríkjamanna 20. október síðast liðinn. Verkefnið fjármagna fyrirtækin sem auglýsa á vefnum. Bættu við orðaforðann og gefðu grjón fyrir jólin.

Ritun efnis á vef - tölustafir eða bókstafir?

Hvort er meira grípandi:

Heildarveltan var eitthundrað milljónir króna

Heildarveltan var 100 milljónir króna

Jakob Nielsen segir rannsóknir sínar á lesvenjum notenda á vefnum benda til þess að sú síðari henti betur. Flestir notendur skima texta og grípa þá frekar tölulegar staðreyndir þegar þær eru ritaðar með tölustöfum en þegar þær eru í bókstöfum. Auðvitað er alltaf gott að gæta meðalhófs og á ekki alltaf við að nota tölustafi.

Jakob Nielsen byggir þessa niðurstöðu sína á rannsókn þar sem hann beitti svokallaðri "eye-tracking" aðferð. Þessi aðferð er ekki ný af nálinni og hefur hann notað hana í tíu ár. (Hér er t.d. talan 10 ekki svo merkileg að mér finnist ég þurfa að nota tölustafi). Ég sá þessa aðferð "in action" á ráðstefnunni Markaðssetning á Netinu - RIMC í nóvember. Notandinn fókusar á punkt í ákveðnu tæki svo hægt sé að taka mið af því hvert hann horfir og svo er auganu fylgt á meðan hann skoðar ákveðnar vefsíður jafnvel í þeim tilgangi að leysa ákveðið verkefni. Mjög spennandi aðferð.


Show Numbers as Numerals When Writing for Online Readers
Eyetracking Research
Writing for the Web: A Primer for Librarians

Blogg barna og unglinga

Sonur systur minnar er á tólfta ári og hann langar að eignast bloggsíðu. Systir mín bloggar ekki og vissi ekki alveg hvernig hún ætti að snúa sér í þessu. Hún er heppin - hún var þó spurð!

Fjöldi barna bloggar án þess að foreldrar þeirra viti og fæst barnanna hafa fengið tilsögn hvað varðar hegðun í bloggheimum. Hvað geta foreldrar gert? Við getum kennt börnum okkar netorðin fimm sem eru afrakstur SAFT verkefnisins sem Heimili og skóli stóðu fyrir 2004-2006.

Netorðin fimm

• Allt sem þú segir á netinu endurspeglar hver þú ert




• Komdu fram við aðra eins og þú vilt láta koma fram við þig




• Ekki taka þátt í neinu sem þú veist ekki hvað er




• Mundu að efni sem þú setur á netið er öllum opið - alltaf!




• Þú berð ábyrgð á því hvað sú segir og gerir á netinu

Það má einnig benda þeim á að lesa gátlistann á SAFT vefnum.

Það er geysilega mikilvægt að foreldrar fylgist með og lesi blogg barna sinna reglulega. Þannig komst ég t.d. að því síðasta sumar að yngri dóttir mín skrifaði á bloggið sitt að við værum á leið til Danmerkur í tvær vikur. Ég útskýrði fyrir henni að með því að lesa ýmsar upplýsingar sem hún lét uppi í blogginu sínu var hægt að sjá hvar hún ætti heima og þannig gætu þjófar séð að húsið okkar yrði ágæt bráð þessar tvær vikur. Við fjarlægðum í sameiningu þessa færslu úr blogginu hennar.

Bloglines eða aðrar RSS þjónustur eru handhægar til að fylgjast með bloggum barnanna ef boðið er uppá RSS - annars verðum við bara að vera dugleg að heimsækja bloggið þeirra reglulega.

p.s. Þessi sama systir mín varð amma í dag! Til hamingju Linda amma og auðvitað Lísa Rún og Bjartmar með soninn :o)

Wikipedia og áreiðanleiki upplýsinga

Upp hefur komist um Essjay höfund efnis á Wikipedia sem lengi vel hefur villt á sér heimildir og meðal annars logið til um doktorsgráðu og prófessorsstöðu í trúarbragðafræðum. 31. júlí 2006 birtist viðtal í New Yorker við Essjay:

"One regular on the site is a user known as Essjay, who holds a Ph.D. in theology and a degree in canon law and has written or contributed to sixteen thousand entries. A tenured professor of religion at a private university, Essjay made his first edit in February, 2005. " (Heimild: The New Yorker)

Nú hefur verið bætt við greinina athugasemdum ritstjóra (editor's note) þar sem fram kemur að þegar viðtalið var tekið vissu hvorki blaðakonan og Pulitzer verðlaunahafinn Stacy Schiff hjá The New Yorker, né umsjónarmenn Wikipedia hver Essjay raunverulega var. Hann hefur nú verið rekinn úr Wikipedia samfélaginu.

Áfallið fyrir Jimmy Wales hlýtur að vera þó nokkuð þótt hann viðurkenni seint óáreiðanleika Wikipedia:

"I don't think this incident exposes any inherent weakness in Wikipedia, but it does expose a weakness that we will be working to address," (Heimild: Wikipedia)

Sett hefur verið af stað sérstakt átak í að sannreyna tilvist og menntun höfunda efnis á Wikipedia.

Aldrei, aldrei ALDREI vísa í Wikipedia sem heimild. Þá getur þú alveg eins vísað í Uncyclopedia Wiki.

Úttekt Sameinuðu þjóðanna á aðgengi vefsíðna = 97% óaðgengilegar

Sameinuðu þjóðirnar létu nýverið vinna úttekt á 100 vefsetrum víða um heim og kom í ljós að 97 þeirra voru alveg óaðgengilegar fyrir fatlaða notendur. Heil 73% þessara vefsetra notuðu Java Script í leiðarkerfi sín sem gerði notendum sem nota það ekki ókleift að komast innar í vefinn en á forsíðu. Þetta eru 10% allra notenda Internetsins!

Vefsetrin sem skoðuð voru voru leiðandi á sínu sviði í 20 löndum: flugfélög, bankar, smásöluverslanir, fjölmiðlar og stjórnvöld. Þau þrjú vefsetur sem uppfylltu lágmarkskröfur voru vefir forsætisráðherra Bretlands, kanslara Þýskalands og vefur spænskra stjórnvalda.

Fjórðungur þeirra sem úttektin náði til gætu auðveldlega uppfyllt lágmarkskröfur WCAG 1.0 með litlum tilkostnaði.

Úttektin er sú fyrsta sinnar tegundar og var unnin af fyrirtæki sem nefnist Nomensa.

Frétt á vef SÞ

Frétt á vef Digitaloppertunity.org

Stafræna gjáin - tölvur á bókasöfnin

Ég verð að segja að ég er tiltölulega ánægð með Bill Gates þessa dagana. Samkvæmt fréttum síðasta fimmtudag ætlar stofnun hans að styrkja stjórnvöld í Rúmeníu til þess að koma tölvum fyrir í öllum opinberum bókasöfnum í landinu. "Tilgangurinn er að gera öllum Rúmenum kleyft að nota tölvur og komast á Netið án þess að þurfa að greiða fyrir. Stofnunin stefnir á að gera slíkt hið sama í Chile, Lettlandi, Litháen og Mexíkó á næstu mánuðum." (mbl.is)
Ég er hæstánægð með staðarvalið - bókasöfnin. Þangað geta allir komið. Kannski verður þetta til þess að stafræna gjáin grynnkar eitthvað. Helstu ástæður þess að fólk notar ekki tölvur er kostnaðurinn við að kaupa þær og kunnáttuleysi. Auðvitað verða þessi bókasöfn að einhverju marki að kenna notendum að nota tölvurnar og hvetja til notkunar þeirra. Það er ekki allt fengið með að setja þær upp og stinga í samband.

Viðmót - nytsemi - usability

Uppfærði tenglalistann á vefsíðunni minni á meðan að nemendur hömuðust við verkefnin á usability námskeiðinu hjá Terttu í dag. Fannst hann ótrúlega stuttur - listinn - miðað við að ég skrifaði MA ritgerðina mína um þessi mál. Kannski ég rífi mig upp og bæti enn meira við hann.

Það er t.d. alveg nauðsynlegt að kíkja á Usability.gov - your guide for developing usable & useful Web sites - Þar er svo til allt sem þú þarft að vita!

World Usability Day 2006

Þann 14. nóvember verður í annað sinn haldið uppá World Usability Day - Alþjóðlega nytsemisdaginn (hmm....)
Sjá ehf., Öryrkjabandalagið og forsætisráðuneytið standa fyrir ráðstefnu í tilefni dagsins sem nefnist: Aðgengi á Netinu: hvar erum við stödd? Vakningin sem orðið hefur síðan skýrslan Hvað er spunnið í opinbera vefi kom út síðastliðið haust er þvílíkt frábær.
Ef þú kemst ekki á ráðstefnuna en langar að fylgjast með því sem gerist úti í heimi þennan dag getur þú fylgst með webcasts í staðinn.

Orðasafn í bókasafns- og upplýsingafræði

Nemendur mínir í Internetinu í bókasafns- og upplýsingafræði hafa rætt um hversu mjög skortir gott og nýtt orðasafn í fræðinni. Þau dóu ekki ráðalaus og drifu tveir nemendanna í því að stofna orðasafn á Wikibooks og er ég að rifna úr monti yfir þessu framtaki þeirra. Nú þegar er tengill á orðasafnið á vef Landsbókasafns.

Á vegum Félags um skjalastjórn er starfandi orðanefnd sem vinnur að gerð orðasafns fyrir skjalastjórn. Gamalt orðasafn er til á Íslenskri málstöð og mun það verða uppfært. Þar er líka orðasafn í bókasafns- og upplýsingafræði en hefur enginn tekið það uppá sína arma til uppfærslu. Upplýsing, félag bókasafns- og upplýsingafræða væri kjörinn aðili til að annast þetta orðasafn.

Blogg - topp tíu mistök í viðmóti - seinni fimm

Jakob Nielsen telur það galla ef (6) skipulag bloggsins er eingöngu falið í dagatalinu. Hann leggur áherslu á að bloggarar lykli bloggin sín. Ég er nýbyrjuð á því að velja "labels" hér á Blogger. Man ekki hvort það var í venjulegu Blogger útgáfunni - er með Google aðganginn núna.

(7) Heppilegast er að blogga reglulega svo lesendur þínir viti hvenær þeir megi búast við næstu færslu. Daglegar færslur eru bestar en auðvitað hafa ekki allir tíma eða hreinlega nógu margt spennandi að segja til að geta ritað svo oft. Svo eru aðrir sem blogga oft á dag - eins og Phil Bradley.

(8) Haltu þig við eitt umræðuefni. Hugsaðu um markhópinn þinn og haltu þig við efnið. Þá eru meiri líkur á að þú haldir í lesendahópinn þinn. "Specialized sites rule the Web" segir Jakob Nielsen.

(9) Ekki gleyma því að allir geta lesið bloggið þitt, þar á meðal framtíðar yfirmaður þinn - eða núverandi yfirmaður þinn. Er það sem þú skrifar hæft til birtingar fyrir alþjóð? Ef ekki ættir þú kannski að loka blogginu þínu og veita fáum útvöldum aðgang.

Og loks er það regla sem ég verð að viðurkenna að ég brýt en það er (10) að hafa vefslóð sem tilheyrir þjónustuaðila bloggsins - blogspot dæmið. Ég hef verið að íhuga að kaupa mér eigið lén - þá er það spurningin hverjum er treystandi og hvaða heiti á vefslóðina er nógu grípandi til þess að fólk muni það. kristinosk.net - veit ekki.

Blogg - topp tíu mistök í viðmóti

Jakob Nielsen hefur uppfært lista sinn yfir topp tíu mistök í vefsíðugerð. Í fyrra birti hann lista yfir topp tíu mistökin í viðmóti blogga. Ég ákvað að lesa yfir listann og sjá hvort ég væri að gera eitthvað af þessum mistökum. Tek þessi fyrstu fimm í þessari lotu.

Jú, strax fyrstu tvö á listanum eiga við mig: (1) engar upplýsingar um höfundinn og (2) engin mynd af höfundi. Ég er reyndar varla komin "út úr skápnum" með þetta blogg enn en það er kominn tími á þetta. Það er rétt að það er nauðsynlegt að geta sannreint hvaða snillingur þetta er sem er að tjá sig. Hefur hann reynslu, þekkingu?

Ég reyni eftir mætti að uppfylla skilyrði (3) og hafa titlana lýsandi á færslunum. Það skiptir miklu máli sérstaklega varðandi sendingu færsla í efnisveitur síðar meir. Þú velur hvort þú vilt lesa meira eftir titli færslu og fyrstu línunum sem þú sérð. Þessi týpíska lestrarhefð á vefnum.

Svo er það (4) hvort heiti tengla sé lýsandi? Jú það held ég nú. Title merkið (tag) í kóða fyrir tengil (A hre...) getur komið að miklu gagni - svo maður tali nú ekki um fyrir skjálesarana.

(5) Ef það falla einhver gullkorn má ekki gleyma að tengja í þau. Taka þau til hliðar og merkja sérstaklega. Já, hvað veit maður nema maður segi eitthvað merkilegt :o)

Skólasöfnin blogga

Afmælisnefnd skorar í bókasafns- og upplýsingafræði við HÍ setti saman röð hádegisfyrirlestra og í dag var annar í röðinni haldinn í Þjóðarbókhlöðu. Þar sögðu tveir frábærir skólasafnskennarar frá reynslu sinni, þær Ingibjörg í Flataskóla (gamla skólanum mínum) og Kópavogsskóla (skólanum sem dætur mínar eru í) (tilviljun - já algjör!).

Anna Björg í Kópavogsskóla er að ljúka MLIS námi og sagði frá rannsókn sem hún hefur unnið á viðhorfi skólasafnskennara og bekkjakennara til skólasafnsins. Þar virðist viðhorfið stundum vera að skólasafnskennarinn (sem er "þreyttur bekkjakennari") eigi að kenna börnunum góða hegðun! Ekki er nú öll vitleysan eins. Ingibjörg í Flataskóla sagði frá frábæru lestarmaraþoni þar sem sjöundi bekkur fékk að gista á skólasafninu og lesa með vasaljós fram á nótt.

Skólasafnskennarar leggja grunn að upplýsingalæsi barnanna okkar og tek ég ofan fyrir þeim.

Á fundinum heyrði ég í fyrsta sinn af bloggsíðu skólasafna en það er bloggsíðan Skólabókasafnið. Þessari bloggsíðu er haldið úti af starfsmönnum 12 skólasafna í austurborginni. Frábært framtak þar. Og þær vísa yfir á bloggsíðu Húsaskóla sem er líka alveg frábær. Öflug blogg sem eru títt uppfærð.

Vefráðstefna um hlutverk vefstjórans

Þetta var hin sæmilegasta ráðstefna í gær - Sátt og samstarf hjá SKÝ. Gaman að sjá bæði bókasafnsfræðinga og bókasafnsfræðinema þar :o)

Fókusinn var hlutverk vefstjórans, verkefnistjórn og mælingar á árangri.

Tækni
- við lítum á hana í dag sem skapandi verkfæri en ekki lengur eingöngu sem samskiptatól

Einstaklingshyggja
- fóllk vill láta koma fram við sig sem einstaklinga þótt það þrífist í samfélögum á netinu. Vill t.a.m. finna sjálft það sem það leitar að - leit og leiðarkerfi kýrskýrt. Simmi hjá Icelandair líkti vefnum við bar - fólk vill annað hvort stutt kynni eða stofna til langtímasambands

Vefurinn:
- valdi ekki valkvíða - ekki of mikið í boði
- sé persónulegur - tali við mig
- sendi mig ekki á villigötur - í botnlanga

Rætt var um:
- þörf þess að mennta vefstjóra sérstaklega - ekkert sérhæft nám í boði í dag - skorað á skólana
- of litla áherslu á vefmál í fyrirtækjum og stofnunum og þar með hættuna á að vefstjórar brenni út
- of mikið álag og of lítill tími fyrir vefmálin (28% stofnana eru með sérstakan starfsmann í vefmálum og þótti það sjokkerandi tala (Sjá skýrsluna: Hvað er spunnið í opinbera vefi?))
- mikilvægi þess að allir átti sig á að þetta er stærðarinnar fjárfesting sem við höldum utan um og þarf því að gera allt vel

Vefstjórinn má taka sig saman í andlitinu
- Meiri agi - Meiri forvinna og skipulagning í stórum sem smáum verkefnum
- Meiri mælingar til að mæla ROI
- Þarf að þekkja tæknilega umhverfið vel

Vandamálin hjá IT birgjunum
- Segja ekki alltaf satt um stöðuna - taka á sig of mörg verkefni og segja mögulegt að gera hlut
- Þurfa að gera meiri kröfur til okkar um forvinnu

Í vefmál þarf:
- textasmið
- ritstjóra
- markaraðsmann
- tæknigúru
- sérfræðing í innri ferlum
- árangursmatsmann
- sölumann
- einhvern sem skilur notendur
- þróunarstjóra
- hugsjónamann með framtíðarsýn
- einhvern sem safnar hugmyndum frá samstarfsfólki
- einhvern sem hefur góðan aðgang að stjórnendum
- eftirlitsmann
- gagnrýnanda

Þessi síðasta upptalning er af glærum Áslaugar hjá Sjá.

Vefumsjónarkerfi

Það skiptir öllu að vera með gott vefumsjónarkerfi. Ég hef skoðað tvö ný kerfi undanfarið, já ný fyrir mér. Ég hef unnið með LiSA frá Innn í um fjögur ár, þar af .net undanfarið ár. Ég sá Soloweb um daginn en það er notað af HÍ og Landsbókasafni. Í dag fékk ég svo að líta í annað sinn á Vyre kerfið sem TM Software selja. Vyre kerfið er portal kerfi og er hægt að nýta portlettur frá öðrum í því. Spennandi kostur.
Er á leið á vefráðstefnu á morgun á vegum SKÝ þar sem umfjöllunarefnið verður meðal annars tilvistarkreppa vefstjóra og verkefnistjórnun. Svo er önnur spennandi ráðstefna í nóvember Reykjavík Internet Marketing Conference & Expo.